1919 წლის 12 ივნისის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს ვ. ქავთარაძის და ალ. არაბიძის განცხადება, რომ გასაყიდად გამოვიდა საზოგადოების გამოცემა, სეით იაშვილის წიგნი „მოკლე სახელმძღვანელო ბუნების მეტყველებისა – ბოტანიკა“. წიგნი იყო 50 გვერდიანი და ღირდა 7 მანეთი. მათი განცხადებით, სახელმძღვანელოები კიდევ უნდა გამოეცათ, მაგრამ ამის საშუალება არ იყო. ისინი გამგეობას ამ გამოცემის ნაღდ ფულზე შეძენას სთხოვდნენ. წიგნი სულ 7000 ცალი დაიბეჭდა. ცალზე 2 მანეთს აკლებდნენ. ფულის მიღება შეეძლოთ რომელიმე ბანკში ჩეკით. გამგეობამ შესაძლებლად მიიჩნია ქავთარაძისა და არაბიძისგან ს. იაშვილის 7000 ცალი „ბოტანიკის“ 40% ფასდაკლებით შეძენა იმ პირობით, თუ გამომცემლები დათანხმდებოდნენ ღირებულების მეოთხედის მიღებას, დანარჩენს კი ნაწილ-ნაწილ მომავალი წლის იანვრამდე მიიღებდნენ.

წყარო: ქართველთა შორის წერა-კითხვის გამავრცელებელი საზოგადოების გამგეობის სხდომების ოქმები | 1919-1919
წყაროს ტიპი: საარქივო დოკუმენტი
გამოცემის ადგილი: თბილისი, საქართველო
ენა: ქართული
დაცულია: საქართველოს იუსტიციის სამინისტროს სსიპ საქართველოს ეროვნული არქივი

ციტირება: ქშწკ გამავრცელებელი საზოგადოების პროსოპოგრაფიულ მონაცემთა ბაზა (თბილისი, 2017). ილიას სახელმწიფო უნივერსიტეტის ლინგვისტურ კვლევათა ინსტიტუტი. ფაქტოიდი 4260 [http://society.iliauni.edu.ge/factoid/article/4260]; წვდომის თარიღი: 2019-09-23