ქშწკგს პროსოპოგრაფია

ფაქტები

რეგისტრირებული ფაქტები46338

1919

ტიპი: თანამდებობა

1919 წლის 20 დეკემბერს განათლების მინისტრის N11896 ბრძანებით ნინო გრიგოლის ასული ბარათაშვილი მამადავითის უმაღლესი დაწყებითი სასწავლებლის მათემატიკის პედაგოგად დაინიშნა.

1919

ტიპი: ღონისძიება

1919 წლის 20 დეკემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომას დაესწრნენ: თავმჯდომარის ამხანაგი თ. კიკვაძე, მდივანი ვ. ბურჯანაძე, წევრები: კ. ნინიძე, შ. დედაბრიშვილი, მ. კაკაბაძე, ქრ. შარაშიძე, ს. იაშვილი, ი. ვართაგავა, თავმჯდომარეობდა დ. კარიჭაშვილი.

1919

ტიპი: ღონისძიება

1919 წლის 20 დეკემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს წინარეხის სკოლის მასწავლებელ ივანე გიუნაშვილის თხოვნა, აღმოეჩინოს მას ერთდროული დახმარება. გამგეობის ცნობით, სკოლა თავის გამგებლობაში მიიღო გორის სამაზრო ერობამ მიმდინარე წლის 1-ლი სექტემბრიდან, გიუნაშვილი სკოლაში 18 წელი მსახურობდა. გამგეობამ გადაწყვიტა, მიეცა ერთდროული დახმარება 1000 მანეთის ოდენობით.

1919

ტიპი: ღონისძიება

1919 წლის 20 დეკემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს ისიდორე კვიცარიძის წინადადება მისი შრომის (თარგმანი) „როგორ ცხოვრობდნენ ძველად ადამიანები“ გამოცემის შესახებ. გამგეობის ცნობით, ხსენებული წიგნი, როგორც მთარგმნელის მიერ წარმოდგენილი საბუთებიდან ჩანდა, ნებადართული იყო სკოლაში სასწავლებლად. კვიცარიძე წიგნის გამოცემის საჭიროებისთვის 50 ოზმა (ქაღალდის საზომი ერთეული, უდრიდა 480 ფურცელს) ქაღალდს იძლეოდა. გამგეობამ გადაწყვიტა, შეედარებინათ კვიცარიძის თარგმანი უკვე დაბეჭდილ წიგნებთან და შემდეგ ემსჯელათ წიგნის გამოცემის შესახებ. შედარება გიორგი ჯავახიშვილს მიენდო.

1919

ტიპი: ღონისძიება

1919 წლის 20 დეკემბერს დავით გიორგის ძე კარიჭაშვლის თავმჯდომარეობით გამართულ ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს ანასტასია კლდიაშვილის თხოვნა სიმონეთის ბიბლიოთეკა-სამკითხველოსთვის საზოგადოების გამოცემებისა და ერთი წლის წინ დათმობილი სურათების უფასოდ მიცემის შესახებ. გამგეობამ მისი თხოვნა დააკმაყოფილა.

1919

ტიპი: ღონისძიება

1919 წლის 20 დეკემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს დიმიტრი უზნაძის თხოვნა მისი ახლადგამოსული სახელმძღვანელოს, „პირველყოფილი კულტურის ისტორია“ – ცალი 20 მანეთად შეძენის შესახებ. გამგეობამ გადაწყვიტა, უსახსრობის გამო ნაღდი ფულით შეძენაზე უარი ეთქვა, მაგრამ წიგნი მიიღეს საკომისიოდ.

1919

ტიპი: ღონისძიება

1919 წლის 20 დეკემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე წიგნის გამომცემლობის გამგე თ. კიკვაძე გამგეობას „დედაენისა“ და „ბუნების კარის" დასასურათებლად სპეციალური მხატვრის (განსაზღვრული ჯამაგირით) მოწვევას სთავაზობდა. გამგეობამ ამ საკითხის განხილვა გადადო.

1919

ტიპი: ღონისძიება

1919 წლის 20 დეკემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს საკითხი, რომ „ბუნების კარის" საბუნებისმეტყველო განყოფილების შემსწორებლად გიორგი ჯავახიშვილი მოეწვით, ხოლო საგეოგრაფიო განყოფილებისა – სამსონ ფირცხალავა. გამგეობამ ხსენებული პირები დაამტკიცა.

1919

ტიპი: ღონისძიება

1919 წლის 20 დეკემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს მინა კოპალეიშვილის თხოვნა მისი კუთვნილი ფულის (სამტრედიის კიოსკში ნამსახური 11900 მანეთი) მიცემის შესახებ. გამგეობის ცნობით, ეს ფული კოპალეიშვილისთვის სამტრედიის ქალაქის გამგეობას 15 ნოემბერს უნდა მიეცა, მაგრამ დღემდე არ გაუსტუმრებია. გამგეობამ საზოგადოების ვექილ კირილე ნინიძეს ამ საქმის გარკვევა დაავალა.

1919

ტიპი: ღონისძიება

1919 წლის 20 დეკემბერს დავით თედეშვილმა ქართველთა შორის წერა-კითხვის გამავრცელებელი საზოგადოების სხდომის ოქმში აღნიშნა, რომ 1917 წლიდან ბაქოს განყოფილებამ საზოგადოების მთავარ გამგეობასთან ურთიერთობა შეწყვიტა.

1919

ტიპი: ღონისძიება

1919 წლის 20 დეკემბერს დავით თედეშვილმა ქართველთა შორის წერა-კითხვის გამავრცელებელი საზოგადოების სხდომის ოქმში აღნიშნა, რომ ბაქოს განყოფილება სიმბოლურად არსებობდა.

1919

ტიპი: ღონისძიება

1920 წლის 3 იანვრის გაზეთ „საქართველოში“ საქართველოს საგარეო საქმეთა მინისტრი ევგენი გეგეჭკორი აზერბაიჯანის საგარეო საქმეთა მინისტრის წერილზე დაყრდნობით იუწყება, რომ 1919 წლის 21 დეკემბერს სომხეთის მთავრობამ დაიწყო საომარი ოპერაციების წარმოება „ზანგი ბაზარის“ რაიონის მაჰმადიანთა წინააღმდეგ.

1919

ტიპი: ავტორობა

1919 წლის 22 დეკემბერს ოზურგეთის ქალთა გიმნაზიის უფროსმა ან. მგელაძემ საქართველოს რესპუბლიკის განათლების მინისტრს მისწერა, რომ ოზურგეთის ქალთა გიმნაზიის პედაგოგიურმა საბჭომ გიმნაზიაში არსებული მდგომარეობიდან გამომდინარე არჩევანი შეაჩერა სოლომონ ანდღულაძეზე. ის სამაგალითო საქმისმწარმოებელი და ერთადერთი სასურველი კანდიდატი იყო. მას ხელს არ შეუშლიდა ფორმალური მიზეზი, რომ ერთი და იმავე შტატის მასწავლებელი იყო ოზურგეთის ვაჟთა გიმნაზიაში.

1919

ტიპი: ავტორობა

1919 წლის 22 დეკემბერს ოზურგეთის ქალთა გიმნაზიის უფროსმა ან. მგელაძემ საქართველოს რესპუბლიკის განათლების მინისტრს მისწერა, რომ პედაგოგიური საბჭოს აზრით, სოლომონ ანდღულაძეს ოზურგეთის ვაჟთა გიმნაზიაში მასწავლებლობა ხელს ვერ შეუშლიდა ქალთა გიმნაზიაში საქმისმწარმოებლად ემსახურა. მას პირველ სასწავლებელში მხოლოდ 15 გაკვეთილი ჰქონდა, შესაბამისად, იქ ნაკლები დრო სჭირდებოდა და ნაკლები ანაზღაურებაც ჰქონდა. მას მატერიალურად ვაჟთა გიმნაზიაში რაც აკლდებოდა, შეეძლო ქალთა გიმნაზიაში აენაზღაურებინა.

1919

ტიპი: ღონისძიება

1919 წლის 22 დეკემბერს ოზურგეთის ქალთა გიმნაზიის უფროსი ან. მგელაძე საქართველოს რესპუბლიკის განათლების სამინისტროსთან შუამდგომლობდა, რომ სოლომონ ანდღულაძე საქმისმწარმოებლის თანამდებობაზე დაეტოვებინათ ქალთა გიმნაზიაში, მიუხედავად იმისა, რომ ის ვაჟთა გიმნაზიის შტატის მასწავლებელი იყო. მათ არ ეგულებოდათ მომზადებული პირი, რომელიც საქმისმწარმოებლის თანამდებობას დაიკავებდა მისდამი რწმუნებულ გიმნაზიაში.

1919

ტიპი: ღონისძიება

1919 წლის 22 დეკემბერს ოზურგეთის ქალთა გიმნაზიის უფროსმა ან. მგელაძემ საქართველოს რესპუბლიკის განათლების მინისტრს მისწერა, რომ 1915 წლიდან სოლომონ ანდღულაძე ოზურგეთის ქალთა გიმნაზიაში საქმისმწარმოებლად მსახურობდა. ის გიმნაზიის კერძო სასწავლებლის სახით გახსნის დღიდან იქ მუშაობდა და ორგანიზაციულ საკითხებშიც აქტიურად მონაწილეობდა.

1919

ტიპი: ავტორობა

1919 წლის 23 დეკემბრის გაზეთ „სახალხო საქმის“ ცნობით, შალვა ნუცუბიძემ კონსერვატორიის დარბაზში წაიკითხა ლექცია „პიროვნების თავისუფლება და ქალთა ემანსიპაცია“.

1919

ტიპი: ღონისძიება

1919 წლის 23 დეკემბრის სხდომაზე მთავრობამ დაადგინა, შინაგან საქმეთა მინისტრ ნოე რამიშვილის განკარგულებით, 10-მილიონიანი ფონდიდან 15000 მანეთი გადაეცა ეპიდემიასთან ბრძოლისას დაღუპულ ექიმ ნიკოლოზ სოლომონის ძე ღოღობერიძის მამას.

1919

ტიპი: ღონისძიება

1919 წლის 23 დეკემბრის სხდომაზე მთავრობამ დაადგინა, რომ თანამდებობიდან განთავისუფლებულიყო სატრანსპორტო საზოგადოების გამგეობის წევრი ვასილ იოსების ძე არდიშვილი მისი თხოვნის საფუძველზე.

1919

ტიპი: თანამდებობა

1919 წლის 23 დეკემბრამდე ვასილ იოსების ძე არდიშვილი იყო სატრანსპორტო საზოგადოების გამგეობის წევრი.

1919

ტიპი: ღონისძიება

1919 წლის 24 დეკემბერს დაბა ონიდან რაჭის სამაზრო საერობო გამგეობის თავმჯდომარე ლობჟანიძე და წევრი მალაქია გობეჯიშვილი სამინისტროს უგზავნიან ნიკორწმინდის უმაღლესი სასწავლებლის პედაგოგის, გიორგი ჭანტურაიას ნამსახურობის ფურცელს და სთხოვენ, დაამტკიცონ უმაღლესი დაწყებითი სასწავლებლის შტატის პედაგოგად.

1919

ტიპი: ავტორობა

1919 წლის 25 დეკემბრის გაზეთ „სახალხო საქმის“ ცნობით, მომარაგების სამინისტრომ შინაგან საქმეთა მინისტრს ნოე ბესარიონის ძე რამიშვილს ბორჩალოს მაზრის ნეიტრალური ზონიდან სომხეთში ხორბლისა და სურსათის გატანის შესახებ აცნობა.

1919

ტიპი: ავტორობა

1919 წლის 25 დეკემბრის გაზეთ „სახალხო საქმის“ ცნობით, შინაგან საქმეთა მინისტრმა ნოე რამიშვილმა ბორჩალოს მაზრის მილიციის უფროსს ნეიტრალური ზონიდან ხორბლის გატანის საწინააღმდეგოდ სასტიკი ზომების მიღება უბრძანა.

1919

ტიპი: ღონისძიება

1919 წლის 25 დეკემბრის გაზეთ „სახალხო საქმის“ ცნობით, სახაზინო თეატრში დიმიტრი არაყიშვილის ოპერა „თქმულება შოთა რუსთაველზე“ დაიდგა.

1919

ტიპი: თანამდებობა

1919 წლის 25 დეკემბერს დაარსებული სავაჭრო-სამრეწველო საკომისიო სახლის მართვა-გამგეობა მინდობილი ჰქონდა კალისტრატე გიორგის ძე ბერიძეს.