ქშწკგს პროსოპოგრაფია

ფაქტები

რეგისტრირებული ფაქტები47756

1919

ტიპი: ნასამართლეობა

1919 წლის 12 მაისს დუშეთის მაზრაში დაპატიმრებული მასწავლებელი აარონ მიხეილის ძე დონდოლაძე შინაგან საქმეთა მინისტრის განკარგულების თანახმად უდანაშაულოდ ცნეს და გაათავისუფლეს. 25 ივნისიდან ის პედაგოგიურ საქმიანობას შეუდგა.

1919

ტიპი: ღონისძიება

1919 წლის 13 მაისს ლეჩხუმის სამაზრო საერობო გამგეობის თავმჯდომარე ალექსანდრე მითაიშვილმა ცაგერიდან განათლების მინისტრ გიორგი ლასხიშვილს აცნობა, რომ ტიფის გამო სკოლებში მოწაფეთა რიცხვი შემცირდა, დარჩენილებსაც ეშინიათ, და მშობლები, მასწავლებლები სწავლის დროებით შეწყვეტას ითხოვენ.

1919

ტიპი: ღონისძიება

1919 წლის 13 მაისს ლეჩხუმის სამაზრო ერობის გამგეობის თავმჯდომარე ალექსანდრე მითაიშვილი (მდივანი ი. ხონელიძე) ცაგერიდან სწერს განათლების მინისტრ გიორგი ლასხიშვილს, რომ მთელ მაზრაში, სვანეთის ჩათვლით, მხოლოდ ორი ტიპის სკოლაა, დაწყებითი და უმაღლესი დაწყებითი; დაბალი სკოლა არის 54, სკოლების მასწავლებლები – 88; უმაღლესი დაწყებითი არის 3, მასწავლებლები – 18.

1919

ტიპი: ავტორობა

1919 წლის 13 მაისს ლეჩხუმის სამაზრო ერობის გამგეობის თავმჯდომარემ, ალექსანდრე მითაიშვილმა (მდივანი ი. ხონელიძე) ცაგერიდან განათლების მინისტრ გიორგი ლასხიშვილს მისწერა, რომ სახალხო სკოლის გასახსნელი ადგილის შესახებ ცნობას მოკლე დროში მიაწვდიდა.

1919

ტიპი: ღონისძიება

1919 წლის 14 მაისს ქართველთა შორის წერა-კითხვის გამავრცელებელი საზოგადოების ქუთაისის განყოფილებამ მთავარ გამგეობას წერილობით შეატყობინა, რომ სოფელ დილიკაურში მათ საკუთრებაში არსებული მამული, რომელიც განყოფილებას გადასცა აბაშიძის ქალმა, შორაპნის მაზრამ სახელმწიფო საკუთრებაში ჩაწერა და მათ აინტერესებდათ კანონიერი იყო თუ არა ეს ქმედება. ხელს აწერს გამგეობის თავმჯდომარის მოადგილე ვარლამ იმნაძე და მდივანი ვუკოლ ბერიძე.

1919

ტიპი: ავტორობა

თბილისის მეორე კომერციული სასწავლებლის დირექტორი ნიკოლოზ დიმიტრის ძე მახათაძე (საქმის მწარმოებელი თ. ლაფერაშვილი) 1919 წლის 15 მაისს ტექნიკური და პროფესიული სასწავლებლების მთავარგამგეს სთხოვდა ეცნობებინა, თბილისის დედათა საეპარქიო სასწავლებლის კურსდამთავრებულებს ჰქონდათ თუ არა უფლება ესწავლებინათ საშუალო სკოლის ყველა კლასში და აეღოთ ისეთივე ჯამაგირი და დამატებები, როგორც უმაღლესი განათლების მქონე პირებს.

1919

ტიპი: ღონისძიება

1919 წლის 15 მაისის „ერთობა“ იუწყება, რომ განათლების სამინისტროს დავალებით ვაჟთა მეოთხე გიმნაზიის დირექტორმა ზაალიშვილმა დაამთავრა თბილისის კერძო სრულუფლებიანი გიმნაზიების რევიზია.

1919

ტიპი: ღონისძიება

1919 წლის 15 მაისს სამტრედიის რკინიგზის უმაღლესი დაწყებითი სასწავლებლის მასწავლებელმა რაჟდენ ქრისტეფორეს ძე აბულაძემ გიორგი ალმასხანის ძე ჭუმბურიძეს მისწერა, რომ წინა კვირას პირადად ესაუბრა მას სამტრედიის რკინიგზის მასწავლებლის თანამდებობაზე დამტკიცების შესახებ. აბულაძის ყველა საბუთი და შუამდგომლობა რკინიგზის სასწავლებლის განყოფილებიდან გადაგზავნილი იყო სამინისტროში. მან გიორგი ჭუმბურიძეს სთხოვა, რაიმე გადაწყვეტილება მიეღო თანამდებობაზე დამტკიცების შესახებ, თორემ წინააღმდეგ შემთხვევაში სწავლის მალე შეწყვეტის გამო სხვა საშუალების გამონახვის შანსს კარგავდა.

1919

ტიპი: ღონისძიება

1919 წლის 15 მაისს ქუთაისის ვაჟთა პირველი გიმნაზიის დირექტორმა ნიკოლოზ მირზიშვილმა საქართველოს დემოკრატიული რესპუბლიკის უმაღლესი და საშუალო სასწავლებლების მთავარგამგეს მისწერა, რომ 1919 წლის პირველი იანვრიდან ნინო ვასილის ასული აკოფაშვილი გერმანული ენის შტატის მასწავლებლად დაამტკიცეს. ხელს აწერენ გიმნაზიის დირექტორი ნიკოლოზ მირზიშვილი და საქმისმწარმოებელი კალისტრატე კონსტანტინეს ძე ჭიჭინაძე.

1919

ტიპი: ავტორობა

1919 წლის 15 მაისს ქუთაისის ვაჟთა პირველი გიმნაზიის დირექტორმა ნიკ. მირზიშვილიმა საქართველოს დემოკრატიული რესპუბლიკის უმაღლესი და საშუალო სასწავლებლების მთავარგამგეს მისწერა, რომ ნინო ვასილის ასული აკოფაშვილმა როგორც მისი ნამსახურებითი სიიდან ჩანდა, დაამთავრა ქერჩის კუშნიკოვის ინსტიტუტი. ხელს აწერენ გიმნაზიის დირექტორი ნიკ. მირზიშვილი და საქმისმწარმოებელი კალისტრატე კონსტანტინეს ძე ჭიჭინაძე.

1919

ტიპი: ღონისძიება

1919 წლის 15 მაისს ქუთაისის ვაჟთა პირველი გიმნაზიის დირექტორმა ნიკ. მირზიშვილმა საქართველოს დემოკრატიული რესპუბლიკის უმაღლესი და საშუალო სასწავლებლების მთავარგამგეს მისწერა, რომ როგორც ნინო აკოფაშვილის სიტყვიერი განცხადებიდან ჩანდა, იგი სამი წელი იყო გერმანიაში სავარჯიშოდ და გერმანული ენის პრაქტიკულად შესასწავლად, ასევე დაამთავრა მიუნხენის კონსერვატორია, რომლის დიპლომი პირველი მოხსენებისთანავე შეუძლია წარმოადგინოს. ხელს აწერენ გიმნაზიის დირექტორი ნიკ. მირზიშვილი და საქმისმწარმოებელი კალისტრატე კონსტანტინეს ძე ჭიჭინაძე.

1919

ტიპი: ღონისძიება

1919 წლის 15 მაისს ქუთაისის ვაჟთა პირველი გიმნაზიის დირექტორმა ნიკ. მირზიშვილმა საქართველოს დემოკრატიული რესპუბლიკის უმაღლესი და საშუალო სასწავლებლების მთავარგამგეს სთხოვა ეცნობებინა ჯამაგირი ნინო ვასილის ასულ აკოფაშვილისთვის მიეცა როგორც საშუალო განათლების მქონე, თუ როგორც უმაღლესი განათლების მქონე მასწავლებლისთვის. ხელს აწერენ გიმნაზიის დირექტორი ნიკ. მიზიშვილი და საქმისმწარმოებელი კალისტრატე კონსტანტინეს ძე ჭიჭინაძე.

1919

ტიპი: ღონისძიება

1919 წლის 15 მაისს ქართველთა შორის წერა-კითხვის გამავრცელებელი საზოგადოების სენაკის განყოფილებამ მთავარ გამგეობას გაუგზავნა იმ კითხვების სია, რომლებიც უნდა განეხილათ განყოფილების წევრთა წლიურ საზოგადო კრებაზე, რომელიც შედგებოდა 15 იანვარს.

1919

ტიპი: ღონისძიება

1919 წლის 15 მაისს გარდაცვლილი იონა მეუნარგია ცაიშის ძველი ეკლესიის გალავანში, საოჯახო ეკლესიაში დაკრძალეს.

1919

ტიპი: გარდაცვალება

1919 წლის 15 მაისს ახალ სენაკში გარდაიცვალა იონა მიხეილის ძე მეუნარგია.

1919

ტიპი: ღონისძიება

მთავარგამგე ჭუმბურიძე 1919 წლის 16 მაისს ცაგერში მითაიშვილს სწერს, რომ, ცირკულარის თანახმად, სასწავლო წელი 31 მაისს უნდა დასრულდეს, განსაკუთრებული პირობების გამო შესაძლებელია მოსწავლეთს ადრე დათხოვნაც.

1919

ტიპი: ავტორობა

1919 წლის 16 მაისის განცხადებას რაჟდენ ქრისტეფორეს ძე აბულაძის საკითხის გადადების შესახებ ხელს აწერს გიორგი ალმასხანის ძე ჭუმბურიძე.

1919

ტიპი: ღონისძიება

1919 წლის 16 მაისს თბილისის ქალთა მე-3 გიმნაზიის დირექტორმა ევგენი ჭოღოშვილმა სახალხო განათლების სამინისტროს კანცელარიის დირექტორს გადასცა: 1) 30 მარტის ოქმი N 7, 2) 7 აპრილის სხდომის ოქმი N 8, 3) 10 აპრილის სხდომის ოქმი, 4) მასწავლებელ გრიგოლ ამაღლობელის 1919 წლის 22 მარტის თხოვნა და ამავე ამაღლობელის დამატებითი თხოვნა, 6) დირექტორ ევგენი ჭოღოშვილის მიმართვა მასწავლებლის კავშირის გამგეობის თავმჯდომარის მიმართ, მიმართვის ასლი მთავარგამგეობის მიმართ და ასევე ასლი, 1919 წლის 19 თებერვლის თბილისის ქალთა მე-3 გიმნაზის ოქმის ამონაწერიდან. კანცელარიის დირექტორს საბუთები უკან უნდა დაებრუნებინა. ხელს აწერენ: დირექტორი ევგენი ჭოღოშვილი და საქმისმწარმოებელი გრიგოლ ამაღლობელი.

1919

ტიპი: ღონისძიება

1919 წლის 17 მაისის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომას დაესწრნენ წევრები: შ. დედაბრიშვილი, ვ. ბურჯანაძე, ი. ვართაგავა, თავმჯდომარეობდა დ. კარიჭაშვილი.

1919

ტიპი: ღონისძიება

1919 წლის 17 მაისს ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე წერაქვის სკოლის მასწავლებელ მარიამ ღიბრაძის საკითხი განიხილეს. ვინაიდან, წერაქვში იმატა სომხებსა და ქართველებს შორის შეტაკებებმა და გახშირებული იყო გზაზე ძარცვა-გლეჯა, ქალი მასწავლებლის იქ წასვლა შეუძლებელი იყო. სექციამ საჭიროდ ჩათვალა, გადაეხედა გამგეობის დადგენილებისთვის ღიბრაძესთან დაკავშირებით. მისთვის უნდა მიეცათ ჯამაგირი სამოსწავლო წლის ბოლომდე, რადგან იგი აღდგომამდე, ე. ი. თითქმის წლის ¾ ნაყოფიერად მუშაობდა სკოლაში. მიზანშეწონილი იქნებოდა, თუ გამგეობა ღიბრაძეს მასწავლებლად ბორჩალოს სკოლაში დანიშნავდა. გამგეობამ საკითხის განხილვა გადადო.

1919

ტიპი: ღონისძიება

1919 წლის 17 მაისის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს საკითხი შიო მღვიმელის საბავშვო ლექსების გამოცემის შესახებ. სასკოლო სექციამ დაადგინა, რომ გამოიცეს შიო მღვიმელის ლექსები ოთხ წიგნად, იპოლიტე ვართაგავას წინადადების შესაბამისად. ავტორს 1200 მანეთი უნდა გადაეცეს ჰონორარის სახით. გამგეობამ ამ საკითხის განხილვა მომდევნო სხდომისთვის გადადო.

1919

ტიპი: ღონისძიება

1919 წლის 17 მაისს ქართველთა შორის წერა-კითხვის გამავრცელებელი საზოგადოების გამგეობის სხდომაზე განიხილეს ზუბალაშვილის სახელობის ყოფილი სტიპენდიატის დავით ანდუყაფარის ძე ჩხეიძის (თურდოპირელი) თხოვნა, მისგან საკომისიოდ მიღებული წიგნების „გაწყვეტილი ზღაპრის“ ფასი ვალად ჩარიცხოდა. მისი ვალი შეადგენდა 1200 მანეთს, ხოლო მიღებული საკომისიო წიგნების ღირებულება – 800 მანეთს. გამგეობამ წინადადება მიიღო.

1919

ტიპი: ღონისძიება

1919 წლის 17 მაისს ქართველთა შორის წერა-კითხვის გამავრცელებელი საზოგადოების გამგეობის სხდომაზე განიხილეს ყოფილი სტიპენდიატის, ვალერიან ახვლედიანის განცხადება დარჩენილი ვალის (1695 მანეთს) ნაწილ-ნაწილ, თვეში 50 მანეთის, გადახდის შესახებ. გამგეობამ ეს წინადადება მიიღო.

1919

ტიპი: ღონისძიება

1919 წლის 17 მაისის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს რაბათის საქველმოქმედო საზოგადოების რწმუნებულ ალიოზ ბათმანაშვილის თხოვნა, დახმარება აღმოუჩინონ წიგნებით და ჟურნალ-გაზეთებით რაბათის ბიბლიოთეკას და ქართულ სკოლას. ქართული სკოლის ოთხი განყოფილებისთვის ის ითხოვდა საჭირო სახელმძღვანელოებს, თითო განყოფილებისთვის 25 ცალს და ფულით დახმარებას 10000 მანეთამდე. გამგეობამ დაადგინა, რაბათის ბიბლიოთეკისთვის მიეცა დახმარება 300 მანეთი ფულად ან წიგნებით, როგორც ისურვებდნენ მთხოვნელები.

1919

ტიპი: ღონისძიება

1919 წლის 17 მაისის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს სამხედრო სამინისტროს სატოპოგრაფიო განყოფილების თხოვნა, გადასცემოდათ მათ გადასაწერად საქართველოს გეოგრაფიული ლექსიკონი, რაც საჭირო იყო მათთვის 5 ვერსტიანი მასშტაბის რუქის გამოსაცემად. გამგეობამ ამ საკითხის განხილვა გადადო.