ქშწკგს პროსოპოგრაფია

ფაქტები

რეგისტრირებული ფაქტები47996

1919

ტიპი: ღონისძიება

1919 წლის 4 ნოემბერს თბილისის რეალური სასწავლებლის დირექტორი ალექსანდრე მდივანი და საქმისმწარმოებელი გ. მამულაშვილი განათლების სამინისტროს საშუალო სასწავლებელთა მთავარგამგეს სთხოვენ, რომ მ. ბალანჩივაძე 1-ელი ოქტომბრიდან მისდამი დაქვემდებარებულ სკოლაში გეომეტრიის მასწავლებლად დაამტკიცონ.

1919

ტიპი: ავტორობა

1919 წლის 6 ნოემბრის გაზეთ „საქართველოს რესპუბლიკის“ ცნობით, დიმიტრი არაყიშვილის ოპერის „თქმულება შოთა რუსთაველზე“ პრემიერისთვის ქართულ სამუსიკო საზოგადოებაში დაიწყო საოპერო სტუდიისა და კაპელის გაერთიანებული რეპეტიციები.

1919

ტიპი: ღონისძიება

1919 წლის 6 ნოემბერს გიორგი ალმასხანის ძე ჭუმბურიძემ 1-ელი ოქტომბრიდან ჯავის უმაღლესი პირველდაწყებითი სკოლის ფერშლად პეტრე მაღაევი დანიშნა.

1919

ტიპი: ღონისძიება

1919 წლის 6 ნოემბერს გიორგი ალმასხანის ძე ჭუმბურიძემ გორის სამაზრო ერობას სთხოვა, ეცნობებინა ჯავის უმაღლესი სასწავლებლის გამგისთვის 3 ოქტომბრის N34 შუამდგომლობის პასუხი, რომ განათლების სამინისტრო დავით გიკაევის მასწავლებლად დანიშვნის წინააღმდეგი იყო.

1919

ტიპი: ღონისძიება

1919 წლის 6 ნოემბერს თბილისის რეალური სასწავლებლის დირექტორმა ალ. მდივანმა საშუალო სასწავლებლის მთავარგამგეს მ. ბალანჩივაძის გეომეტრიის მასწავლებლად დამტკიცება სთხოვა. ასევე მისწერა, რომ ქუთაისის სახალხო სკოლების უფროსისაგან ბალანჩივაძის დოკუმენტების მიღებას ათი დღის განმავლობაში ელოდებოდა, მაგრამ არ მიუღია. ხელს აწერენ: დირექტორი ალ. მდივანი და საქმისმწარმოებელი გ. მამულაშვილი.

1919

ტიპი: თანამდებობა

1919 წლის 7 ნოემბერს სახალხო განათლების სამინისტრომ თბილისის რეალური სასწავლებლის დირექტორს მიმართა, რომ 1-ელი ოქტომბრიდან სასწავლებლის უმაღლესი დაწყებითი სკოლის მათემატიკის მასწავლებლად მ. ბალანჩივაძე დაენიშნათ.

1919

ტიპი: ღონისძიება

1919 წლის 7 ნოემბერს მთავარგამგე სერგი იოსების ძე დანელიამ და საქმისმწარმოებელმა ნიკოლოზ ივლიანეს ძე აბესაძემ თბილისის რეალური სასწავლებლის დირექტორს აცნობეს, რომ სასწავლებელთან არსებული უმაღლესი დაწყებითი სკოლის მათემატიკის მასწავლებლად 1919 წლის 1-ლი ოქტომბრიდან მ. ბალანჩივაძე დანიშნეს.

1919

ტიპი: ღონისძიება

1919 წლის 7 ნოემბერს ოლივერ უორდროპი, უეითი, გრანდი და მამუკა ორბელიანი სიღნაღის, გურჯაანის, თელავისა და წინანდლის დასათვალიერებლად კახეთში გაემგზავრნენ.

1919

ტიპი: ავტორობა

1919 წლის 7 ნოემბერს მეუღლისთვის გაგზავნილ წერილში ოლივერ უორდროპმა იმედი გამოთქვა, რომ წლის ბოლომდე გაიგებდა, რას გეგმავდა ანტანტა საქართველოსთან დაკავშირებით.

1919

ტიპი: ავტორობა

1919 წლის 8 ნოემბრის გაზეთ „საქართველოს რესპუბლიკის“ ცნობით, ნოე რამიშვილმა სრულიად საქართველოს მასწავლებელთა დელეგატების ყრილობაზე ტექნიკური ძალების არქონის პრობლემაზე ისაუბრა, რაც აფერხებდა არა მარტო პროფესიულ განათლებას, არამედ სახელმწიფო შემოქმედებასაც. მინისტრმა იმედი გამოთქვა, რომ ეს ნაკლი ახლო მომავალში გამოსწორდებოდა.

1919

ტიპი: ავტორობა

1919 წლის 8 ნოემბრის გაზეთ „საქართველოს რესპუბლიკის“ ცნობით, საქართველოს კონსულმა ოდესაში ევსეი უშვერიძემ მიიღო პოლონეთის რესპუბლიკის საგარეო საქმეთა მინისტრის სტანისლავ პატეკის მადლობის წერილი, რომელშიც ნათქვამია, რომ ევსეი უშვერიძე სიცოცხლის ფასად იცავდა პოლონეთის მოქალაქეებს ბოლშევიკური ტერორისგან.

1919

ტიპი: ღონისძიება

1919 წლის 8 ნოემბერს დავით კარიჭაშვილის თავმჯდომარეობით გამართულ ქართველთა შორის წერა-კითხვის გამავრცელებელი საზოგადოების მთავარი გამგეობის სხდომას ესწრებოდნენ: თავმჯდომარის მოადგოლე თევდორე კიკვაძე, მდივანი ვარლამ ბურჯანაძე და წევრები: შიო დედაბრიშვილი, ნინო ნაკაშიძე, სეით იაშვილი, მეთოდე კაკაბაძე, ი. გიორგობიანი, იპოლიტე ვართაგავა.

1919

ტიპი: ღონისძიება

1919 წლის 8 ნოემბერს დავით გიორგის ძე კარიჭაშვილის თავმჯდომარეობით გამართულ ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს ვარლამ ბურჯანაძის მოხსენება სკოლებისა და ბიბლიოთეკების ქონების გადაცემის შესახებ. როგორც მოხსენებიდან ჩანდა, ვ. ბურჯანაძემ ატენის და ვარიანის სკოლები გორის სამაზრო ერობას გადასცა, აკაურთას სკოლა – ბორჩალოს სამაზრო ერობას, სამტრედიის ბიბლიოთეკა-სამკითხველო და წიგნის სავაჭრო კიოსკი წიგნებით – ქალაქის გამგეობას. საზოგადოების გამგეობამ მოხსენება ცნობად მიიღო და სამტრედიის თვითმართველობას ვალად 37590 მანეთი და 64 კაპიკი დააწერა.

1919

ტიპი: ღონისძიება

1919 წლის 8 ნოემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს კონსტანტინოპოლში მყოფი საქართველოს მისიის შუამდგომლობა იქ მცხოვრებ ქართველ მაჰამდიანთათვის ქართული სკოლის დაარსების შესახებ. საგარეო საქმეთა სამინისტროს აზრით, სკოლის დაარსებას კონსტანტინოპოლში დიდი მნიშვნელობა ექნებოდა. გამგეობამ გადაწყვიტა, მიეწერა საგარეო საქმეთა სამინისტროსთვის, რომ საზოგადოების გამგეობა სიამოვნებით იკისრებდა კონსტანტინოპოლში ქართული სკოლის გახსნას, რისთვისაც შეიმუშავებდა შესაფერის გეგმას და ხარჯთაღრიცხვას.

1919

ტიპი: ღონისძიება

1919 წლის 8 ნოემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს ინსტრუქციების პროექტი წიგნთსაწყობის გამგის, წიგნების გამომცემლობის ხელმძღვანელის, მდივნის, ხაზინადარის და კორექტორისთვის. გამგეობამ შესწორებით დაამტკიცა თავმჯდომარის და წიგნების გამომცემლობის გამგის ინსტრუქციების პროექტები, დანარჩენი ინსტრუქციების პროექტების განხილვა გადაიდო შემდეგი კრებისთვის.

1919

ტიპი: ღონისძიება

1919 წლის 8 ნოემბრის ქართველთა შორის წერა-კითხვის გამავრცელებელი საზოგადოების მთავარი გამგეობის სხდომაზე განიხილეს „ბუნების კარის“ სალიტერატურო განყოფილების გამსწორებელი კომისიის აზრი მისი შესწორების შესახებ. კომისიის აზრით, „ბუნების კარს“ უნდა დარჩენოდა ენციკლოპედიური ხასიათი და მეთოდი, აგრეთვე მასალის დალაგების სისტემაც. გამგეობამ საკითხის განხილვა გადადო.

1919

ტიპი: ავტორობა

1919 წლის 8 ნოემბერს გრიგოლ იასონის ძე ამაღლობელი ქუთაისის რეალური სასწავლებლის დირექტორს სწერს, რომ მარტის შუა რიცხვებში საპატიო მიზეზით თბილისის ქალთა მე-3 გიმნაზიაში მასწავლებლად მუშაობა შეწყვიტა. მან ორი თვის შემდეგ მიიღო თავისუფლება ანაზღაურების შენარჩუნებით. ამ მიზეზით სამინისტრომ მისი შტატის მასწავლებლად დამტკიცება ვერ მოასწრო. 1919 წელსაც გიმნაზიაში შტატის გარეშე მასწავლებლად დაინიშნა. ის დირექტორს სთხოვდა სამინისტროსთან შუამდგომლობას, რომ პირველი სექტემბრიდანვე შტატის მასწავლებლად დაემტკიცებინათ, როგორც უმაღლესი განათლების მქონე.

1919

ტიპი: ღონისძიება

1919 წლის 8 ნოემბერს მთავარგამგე სერგი იოსების ძე დანელიამ და საქმისმწარმოებელმა ნიკოლოზ ივლიანეს ძე აბესაძემ ქუთაისის ვაჟთა პირველი გიმნაზიის დირექტორ ნიკოლოზ მირზიშვილს აცნობეს, რომ ნინო ვასილის ასული აკოფაშვილი 1918 წლის პირველი სექტებრიდან გერმანული ენის შტატის მასწავლებლად დაამტკიცეს.

1919

ტიპი: ავტორობა

1919 წლის 10 ნოემბერს დუშეთის უმაღლესი დაწყებითი სასწავლებლის გამგე იასონ ელიზბარის ძე ალექსიშვილმა საქართველოს დემოკრატიული რესპუბლიკის განათლების სამინისტროს უმაღლესი და საშუალო სასწავლებლის მთავარგამგეს მისწერა, რომ ოჯახური მიზეზების გამო დუშეთის უმაღლეს სასწავლებელში მუშაობის გაგრძელება აღარ შეეძლო და თბილისის რომელიმე სასწავლებელში გადაყვანა ითხოვა.

1919

ტიპი: ავტორობა

თბილისის ვაჟთა V გიმნაზიის გამგემ, ი. ჯიშკარიანმა (საქმის მწარმ. მხეიძე) 1919 წლის 10 ნოემბერს საშუალო სასწავლებელთა მთავარგამგეს წარუდგინა ქართული ენისა და ისტორიის კურსის პროგრამები არაქართული კლასებისთვის.

1919

ტიპი: ნასამართლეობა

1919 წლის 11 ნოემბერს დააპატიმრეს მთიულიშვილი, რომელიც ბრალდებული იყო ბოლშევიკურ–ყაჩაღთა გამოსვლების ხელმძღვანელობასა და მონაწილეობაში, ასევე მოქალაქეების მთავრობის წინააღმდეგ ამხედრებაში. იგი იმყოფებოდა გორის საპყრობილეში.

1919

ტიპი: ავტორობა

1919 წლის 12 ნოემბერს მალაქია გრიგოლის ძე გობეჯიშვილი სწერს განათლების მინისტრს, რომ რაჭის მაზრის 60 პროცენტზე მეტი წერა-კითხვის უცოდინარია. როგორც მცირეწლოვანთათვის, ისე უფროსთათვის სკოლები საკმარისი არ იყო. ერობის გამგეობას განზრახული ჰქონდა მთელი რიგი საკვირაო სკოლების გახსნა. ამისათვის არ არსებობდა არც სასურველი კადრები და არც საკმარისი სახსრები, რისთვისაც აუცილებელი იყო მთავრობის დახმარება. დაარსებული იყო ხუთი საკვირაო სკოლა. წარდგენილ ფურცელზე იყო ამ სკოლების და სკოლის გარეშე განათლების ხარჯთაღრიცხვა. მაზრის გამგეობა სთხოვდა განათლების მინისტრს შუამდგომლობას მთავრობის წინაშე, რათა გამგეობის განკარგულებაში გადადებულიყო წელიწადში 160 ათასი მანეთი მაზრაში საზოგადო სკოლის გარეშე განათლებისთვის.

1919

ტიპი: ღონისძიება

1919 წლის 12 ნოემბერს ჯავის უმაღლესი პირველდაწყებითი სასწავლებლის ინსპექტორს ამავე წლის 3 ოქტომბრის N55 შუამდგომლობაზე განათლების სამინისტრომ უპასუხა, რომ სკოლის ფერშლად პეტრე მაღაევი დაინიშნა 2 ოქტომბრიდან. დოკუმენტს ხელს აწერდნენ მთავარგამგე ვუკოლ ბერიძე და საქმისმწარმოებელი ჯ. გველესიანი.

1919

ტიპი: ღონისძიება

1919 წლის 12 ნოემბერს განათლების სამინისტრომ გორის სამაზრო ერობას სთხოვა ეცნობებინა ჯავის უმაღლესი დაწყებითი სასწავლებლის გამგისთვის, რომ 3 ოქტომბრის N54 შუამდგომლობა დავით გიკაევის მასწავლებლად დანიშვნის შესახებ სამინისტრომ არ შეიწყნარა. ხელს აწერენ მთავარგამგე ვუკოლ მიხეილის ძე ბერიძე და საქმისმწარმოებელი ჯ. გველესიანი.

1919

ტიპი: ავტორობა

1919 წლის 12 ნოემბერს ქუთაისის ვაჟთა პირველი გიმნაზიის დირექტორმა თბილისის ვაჟთა მე-6 გიმნაზიის დირექტორს მისწერა, რომ 1919 წლის 8 ნოემბრის N 2296 მიწერილობის თანახმად, გაუგზავნა თავისი რწმუნებული გიმნაზიის მე-6 კლასის ყოფილი მოსწავლის ვახტანგ ამბოქაძის დათხოვნის მოწმობა, დაბადების მოწმობა N 38, აცრის მოწმობა N 475 და წოდების მოწმობა ნამსახურეობითი სიის პირთან ერთად. სთხოვა, ხსენებული საბუთების მიღება ეცნობებინა. ხელს აწერენ: გიმნაზიის დირექტორი ნიკოლოზ მირზიშვილი და საქმისმწარმოებელი კალისტრატე ჭიჭინაძე.